बयशी सय !

बयशी सय !

वसईतील कुपारी समाजाला फार मोठा इतिहास आहे परंतु दुर्दैवाने तो योग्य पद्धतीने लिखित स्वरुपात जतन झालेला नाही. आपल्या जुन्या चालीरीती, गाणी, जुने संदर्भ, समाजाला कलाटणी देणाऱ्या घटना ह्या फक्त मौखिक स्वरुपात जुन्या पिढीकडून नव्या पिढीकडे हस्तांतरित झालेल्या आहेत. मागच्या एक दशकाचा आढावा घेतल्यास इंटरनेट तंत्रज्ञानाने जग जवळ आणले आहे परंतु त्या स्वरुपात जुन्या पिढीचे नव्या पिढीकडे होणारे ऐतिहासिक संदर्भाचे हस्तांतर कमी झालेले आहे.

आपल्या कडे ८०-९० वर्षाचे अनेक वडीलधारी मंडळी आहेत, हि मंडळी जो पर्यंत ह्यात आहेत तोपर्यंतच जुना इतिहास त्यांच्याबरोबर राहील. पण पुढे काय?. ह्या वडीलधारी मंडळीकडून बरीच माहिती आपण जमवून येणाऱ्या पिढीसाठी लिखित किव्हा ध्वनीमुद्रित स्वरुपात आपण साठवून ठेवू शकतो. स्वातंत्र्यपूर्व काळातील वातावरण, तेव्हाची शेती, राहणीमान, लग्नसोहळे, दुष्काळ, रोगराई, भुताखेताच्या गोष्टी असा अनेक माहितीचा खजाना आपण त्यांच्याकडून मिळवू शकतो.

सदर गोष्टीचा विचार करता मी व रॉजर रोड्रिग्ज Roger Baptista Rodrigues ह्याने पुढाकार घेवून आपल्या विविध गावातील ८०-९० वरील लाल लुगडे परिधान करणाऱ्या 'बय' च्या मुलाखती घेण्याचे ठरविले आहे. सदर मुलाखत विडीओ रेकोर्डिंग करून सोशल मिडियाद्वारे आपल्यापर्यंत पोहोचवली जाईल व पुढे जावून सगळ्या मुलाखती पुस्तक रुपात आपल्या पुढे आणल्या जातील. ह्या कामी आर्थिक सहाय्य कबुल केल्याबद्दल TEAM SVS चे मी विशेष आभार मानतो.

आपल्या सर्वाना विनंती आहे कि मुलाखती दरम्यान विचारले जाणारे प्रश्न कसे असावेत जेणेकरून जास्तीत जास्त माहिती आपण गोळा करू शकू, ह्या संबंधात आपण आपले विचार इथे मांडावेत. त्याच प्रमाणे ह्या प्रकल्पात सहाय्य करू इच्छिणार्यांनी आपली नावे मला कळवावीत.